السبت، فبراير 03، 2007

على بوابة عمرى

على بوابة العمر
واقف متشعلق
وبادق بعنف
مش خايف
ولا هايب
أي نتيجة
لعنفى
ولا ندمان
على موقف مخزى
ياه
على متحف عارى
مرصوص
فى جوانبه
زيفى
وتفاصيل
أحقادى
وخوفى
لما بحاول ادخل
العسكر
يحتجزونى
ادفع رسم دخول
من ضحكى الشرير
ونيابى الزرقا
تقطع فى الحتة الحمرة
ورا كل اقفاص الصدر
ويسيل الدم ويتجلط
جواي
وتتكلس أحاسيسى
وتتكوم
فى الركن المعتم منى
جمال الدولى