السبت، نوفمبر 04، 2006

سنتى الوطن بكام

رشة اسبراى
على وشوش الحيطان
معادلهاش معنى

متر الوطن بكام
ازعق بعلو الصوت

ألا أونا
ألا ديه
ألا تريه

يا مستثمرين
المزاد شطب
البياعين جبروا
الباقى من الوطن
أقل من القليل
بنضيع من غير تمن
فى جيوب المستحيل
فى كروش المرتاحين

رشة اسبراى
على وشوش الحيطان
على قلوب الغلابة
المطحونين
على جبين الوطن

رشة اسبراى
مخنوقة بين حرفين
سنتى الوطن بكام

11 تعليقات:

Anonymous غير معرف يقول...

يارب موتنا قبل ما يبقى الوطن بينباع بالمللى مترر
اهلا بك بلوجريا ثانيةً

3:19 ص  
Blogger جمال الدولي يقول...

وممكن يا سيدى
الوطن ينباع بالفيمتو مللى

12:04 م  
Blogger كراكيب نـهـى مـحمود يقول...

جميله وكلها وجع
وفيها شخصية جمال الدولى وسيرته المعجونه بحب البلد لا معدتش كفايه رش الاسبريه على الحيطان
كمل

2:02 ص  
Blogger شيمـــــاء يقول...

جميلة فيها حب للوطن جميل اوى
و وجع عليه
و احلى حته رشة اسبراى على الحيطان

2:23 م  
Blogger جمال الدولي يقول...

كراكيب
اجمل زيارة
واجمل شخصية زارتنى برجاء دوام التواصل


شيماء
شكراً
بحب فيكم
شكل الوطن

1:52 ص  
Blogger مـحـمـد مـفـيـد يقول...

عزيزي جمال
خلاص مش بالسنتي ده بال.......
مش لاقي وحده قياس اصغر من الفيمتو

3:08 ص  
Blogger جمال الدولي يقول...

محمد مفيد

11:04 ص  
Blogger جمال الدولي يقول...

محمد مفيد
أهلا بك
هم الجماعة دول
عملوا براءة اختراع
فى كيفية بيع الأوطان وعنها
خدوا نوبل

11:06 ص  
Blogger Unknown يقول...

رائع ان تتحدث بهذا الأسلوب الساخر
وأن تستخدم شخصية بهذا الزخم
انتظر منك الكثير

11:25 ص  
Anonymous غير معرف يقول...

هذه المدونة من الذ المدونات
فيكفيها انها تقطر سخرية ممتزجة
بحب الوطن والرغبة فى التغيير
لكن يعيبها الكسل
ننتظر الكثير
يا جيمى

11:27 ص  
Blogger Unknown يقول...

حسبى الله ونعم الوكيل ... انا عملت السنة اللى فاتت بحث عن خصخصة عمر أفندى ، من خلال البحث عرفت ايه هو عمر أفندى اللى يعتبر جزء مهم جدا من مصر ( مبانى - جراجات - مساحات - عمال - وأهم من ده كله مواقعه اللى تعتبر فى قلب مصر)ثروة هائلة جدا تقريبا تقدر ب4مليار، لحد السنة اللى فاتت ماكنش إتباع بس السنة دى عرفت إنه إتباع خلاص زى ما كل شئ إتباع او هيتباع لسة

خايقة يجى علينا يوم يبيعوا فيه المواطن المصرى فى مازاد علنى

حسبى الله ونعم الوكيل

9:25 ص  

إرسال تعليق

الاشتراك في تعليقات الرسالة [Atom]

<< الصفحة الرئيسية